سفیر الحب

صور و افلام بیهه اشتاگ، گلّی وین اودیهه

یریت الذکریّات اتروح، مثل ما راح راعیهه

گمر وسط النجوم اینور، خبزت عیش بالتنور

روحی اترید تشبع شوف، اخلافک من یسلیهه

الفرگه للبشر نیران، یصعد للسماء الدخان

اهوای اجروح بالدلال، من غیرک یداویهه

ثجیل الوکت یومه اسنین، مطر ینزل تکت العین

طویل اللیل دمعهه ایسیل ،محتاره ابمعازیهه

ایتصور لی تجی فرحان ،شمعه او تضوی الدیران

طفل روحی تفز بالنوم، ابکاروک او تهز بیهه

یراوینی الصبر شیبه، علینه او طالت الغیبه

گلبی ابنار طیر او طار، ابموگدهه او تدویهه

چا یمته الزمان ایعود، و الگعده ترد اردود

عظم صافی ابجسم ممدود، عثره او ممتحن بیهه

ارید انسه و ارید ارتاح، عبرت مای للفلاح

ایتراوالی ابمنامی اشباح، ختله او ریت اعدیهه

اذکرنّک او دمعی ایسیل، نسیم او یزهی نص اللیل

حسافه او ضاع منّی الحیل، اهمومی احلام اطوّیهه

تیهت الدرب محتار، مسجون اصبحت بالدار

من ضیم الوکت غدّار، ساحة حرب و ارویهه

بسّک یا زمن تعبان، تهددنی او ترد خسران

اشمالک تحرگ الدیران، اعیال اللّه او تدویهه

ما اقبل عذر ما اخاف، اتفاقاً زاد عزمی اضعاف

بالنون القسم و الکاف، غیره او لا تشک بیهه

خلنی اطلعهه من بالک، عوف العفرته اشوالک

لا تتهمنی چتّالک ،ادیاری او مانی ناسیهه

چندوب الحزن چندوب، تراوینی الوجه مگلوب

من کل الحصص مسلوب، حسره ابگلبی و افریهه

ابوطنّه او ماکو لگمت عیش، سجنیت النحبهم لیش

ابعیدک روحی غابت طیش، من حقدک تحنیهه

صبریت او حملت اهموم، طاوعتک عمر مندوم

تخجلنی و اضل مسموم، بارمادک تساویهه

تعادینی و اضل احذاک، مثل بنت الشریچه اویاک

تکرهنی و احس منواک، تذبل من تچویهه

یجی ریح او یهز الکون، عند اللّه النصر مضمون

الجنازه تندفن بالگاع ،ما تگدر تغطّیهه

لا تگطع رجاء اعیالک، اعیالک رنّت ادلالک

اذا طحت ابخطر شالک، محنه ابعوزه والیهه

ملینه او لبسنه اچفان ،او طاوعنه حچی الدفّان

ابمضایفنه الفخر عنوان، نحذرک فرصه و اشریهه

خذیت او چردست و اثریت ،ما خلیت خل بالبیت

تتعیّل عبث هدّیت، ابغرامه او ما تراعیهه

حطلک بالثنیّه احدود، ما طول الظلم موجود

وحق ربنه الستر مریود، یجی یوم او تقر بیهه

کاتلنه الفقر و الدین، صحنه احرار مثل احسین

لاوین الظلم لا وین، حد للمسکنه انفیهه

ابشتانه او تایهین ابللیل، نعانی امن المطر و السیل

او بالگیض العطش تنکیل، نبت رمحه او یثنیهه

چا وین الغضب ملفاه، الیصیح احاه ما تلگاه

جهنم نار تتلگاه، مرار ابمر شعدیهه

اذا ما قابل الممنون ،یگضی عمره بس مسجون

یعانی الغربه و الطاعون، انخبطت من یصفیهه

نریداللّه او علی الکرار، یحضرنه او یزیل العار

اجساد او ما نعوف الدار، الذبحنه یمتحن بیهه

ما ردنه ذهب لا مای ،ولا ردنه دوا او لا دای

بس ردنه العداله افیای، تدافع للیباریهه

کل احنه ابدرب ماشین، مظلومین متعذبین

اید اباید متّحدین ،ابکرامتنه او نهد بیهه

ارشدک و اسمع المنهان، ما طول البشر انسان

او ما طول الرزق بیبان، الرب یرسل تهانیهه

اهل بیتک ستر حالک، او بالک تظلم اعیالک

تموت ابغربه اشوالک، تشد عقده او تحل بیهه

لا تبغی عمر کذّاب ،افتح باب للمحراب

خل البیه رحم ینشاب، شهد ینضخ مساریهه

الناس اتحب سوالف جود، ابیا دیره الظلم محمود

الیضر اهله ابحزن مگرود، لو ینذکر طاریهه

ارید ارسل خبر عاجل، موبس الحکم عادل

لبو بیت الستر واصل، الفرش جنحه او یدفیهه

اللّه یرزق البیه زود، لعیاله او یدگ احدود

اذا خیرک صبح مسدود، خطیت ابخطوه رد لیهه

اخبرک مدهشه الاعراض، عواقب تنتسب بامراض

حط حد الصدی الالفاظ، اشرب لا تبدیهه

اخذ درب الصراط او سیر، عوف المکر و التزویر

الارض ملفاک وین اتطیر ،الخیانه من یخاویهه

الکذب ما ینفع الرجال، الخباثه ما تلم اعیال

الهکر ما یشبع الدلال، ابنزل ثوبه او یعرّیهه

من کان مع اللّه او کان، ابگلبه یزهی الایمان

کان اللّه معاه عرفان، ابتهایمهم یبریهه

ما تقبل تسر حالک، کنز تربیت اطفالک

مضیفک جاهک اذلالک ،الکرامه ابخیرک اشریهه

استریح او لو تحس تعبان، الناس اطباع بیهه الوان

قلل بالحچی ابمیدان، اذا کثرت معانیهه

لا تاخذ نظر بالثار، الحاسد عینه ترمی ابنار

الف موته یموت ابعار ،مسلوگ ابچوانیهه

لا تفتح رده اسرارک، رزقک بالسماء اگبالک

الیحکمک لهجة اقرارک، تشعلهه او تطفیهه

مااود الزعل نیران، التایه بالزعل خسران

بیبان الحچی بیبان، شاور من یحل بیهه

لا تشرب خجل مخبوط، العمر مثل الدرج مبسوط

انت انسان مو مربوط ،ابهدء واصعد مبانیهه

ماشی اهل العلم دونک، علم عدهم یعلمونک

ابسلفهم ما یعذبونک، و اعصابک تهدیهه

عوف الطائفیه احزان، خبر موثوق بالقرآن

کلنه نعبد الرحمن، رسول اللّه الفته بیهه

الصدگ بیه صدقه و احروره ،الصدگ تاج او یشع نوره

بخت بیه شاره و اتزوره، ابلمس ایدک تشافیهه

انصحک عوف قیل او قال، مثل مای او نزل شلال

مو کلمن رکب خیّال، الکباره اترید راعیهه

لا تخشی ابعتب من طاح، ولا تشطف نظر من فاح

الشاعر مایشیل السلاح، الشاعر نثره یرمیهه

کلامه نشعه للخطّار ،من دون الخلگ منظار

الشاعر مرشد او محتار، بالدنیه او بلاویهه

صدیج او ما یرید اثبات، گمر ویه النجوم ایبات

گاضی عمره بالاهات، طبابت نفسی اسمیهه

مو کلمن زرع ربحان، ولا کلمن ختل شیطان

صایود المحن  بیه شان، یبوس اتراب رجلیهه

ابوک الفلک بیک ایدور، طبیب اجروحک او دکتور

امک شمس بیهه اتنور، اذا تشکر مساعیهه

احترم والرحمه اتعینک، تزیّن شیبة اسنینک

تذم الشامت ابعینک ،خطف رمشک یحلیهه

العدو لو عاده ما ینساک، ابتهایم باطله یبلاک

الدنیا لو جفت ویاک، ابنهر من ذاتک اسگیهه

غدرنی الما رحم حالی، دهورنی او شده بالی

یبغی رمحه للتالی، شرگ روحی او یشاقیهه

نعتولی الصبر دگّیت، لهمیته ولا ملیت

علی البیهم رحم غصّیت، شلع عینی او لبد بیهه

اشتعل گلبی ابطن چانون، العدهم ظلم میرحمون

کلونی او کسروا الماعون، ابگبر مظلم تخلیهه

حرامیّه او غزو دیران، علی اعناد الشعب فرسان

مسجون ابحماء السجّان، منعوت الیدلیهه

انامن واگصد او افتر، اللّه ایساعد الدفتر

مخنوگ ابگبر و اشعر، حسرتی اترید ادفیهه

کرهیتک و ارید انساک، یا گلبی العتب ویاک

القصیده ما تود ملگاک، لا تشرم تراچیهه

عذبتک عذاب اویای ،یالقاری اظلُمت دنیای

القصیده امطرّزه ابمنوای، الکلمن عاقل اهدیهه

لا تشرم تراچیهه

اریدک تنتخی بیهه

لا واحد یاذّیهه

الشاعر الشعبی: جاسم ثعلبی(الحسّانی) 30/04/1399